Looking for all Articles by Danny Scott?

Sanas sgrìobhaidh Sgeulachdan na h-Alba: A-steach don Fhàsach

Sanas sgrìobhaidh air a bhrosnachadh leis an iomairt againn Sgeulachdan na h-Alba: Dànachd.

Language: Gaelic

Last updated: 05 June 2023

An illustration of a shoe print made of icons on a green background. The icons include a microphone, pens, books, a map of Scotland and the letters BWS

Nuair a smaoinicheas tu air a dhol 'a-steach don fhàsach', dè na h-ìomhaighean a bhios a' tighinn beò nad inntinn? An e coiseachd beinne a th' ann? Snàmh sa mhuir sa gheamhraidh? No 's dòcha a' dol a-steach do sheòmar-cadail do dheugaire? Ge bith dè a th' ann, cùm greim air a' bheachd sin.

Tha amannan ann am beatha a h-uile duin' againn far a bheil sinn a' faireachdainn gu bheil sinn a' dol a-steach don fhàsach, agus gus sgeulachd mhath innse mu na suidheachaidhean sin, feumaidh sinn mothachadh ar luchd-èisteachd a thoirt an sàs. Dè chunnaic thu ann? Dè am fàileadh, blas agus suathadh a fhuair thu ann? Le bhith a' cleachdadh mion-fhiosrachadh mothachaidh nar sgrìobhadh is urrainn dhuinn eòlas fìor chuimhneachail a chruthachadh don luchd-leughaidh againn.

Eacarsaich Blàthachaidh: Rachamaid fiadhaich!

Tadhail air àite fiadhaich faisg air, no am-broinn do dhachaigh (dh'fhaodadh gur e seo do ghàrradh, allt ionadail, callaid a tha air fàs gu mòr – chan fheum e a bhith na mhullach garbh). A' cleachdadh mapa-inntinn no liostaichean sgrìobh sìos am mion-fhiosrachadh mothachaidh a gheibh thu fo na cinn: sealladh, blasad, suathadh, fàileadh agus fuaim.

Air do shlighe dhachaigh, smaoinich air mar a bheireadh tu cunntas air an àite seo do charaid a' cleachdadh a h-uile mion-fhiosrachaidh mothachaidh a ghlac thu.

Beachdaich: dàna-thuras fiadhaich

A bheil làithean, suidheachaidhean no tachartasan làitheil nad bheatha a bha rudeigin 'fiadhaich'? Faigh pìos pàipear bàn agus sgrìobh sìos làithean agus suidheachaidhean a tha a' seasamh a-mach nad chuimhne mar rudeigin fiadhaich. Tachartasan beatha far an robh thu a’ faireachdainn iongantas mu far an robh thu, no gun robh thu dha-rìribh beò. Sgrìobh na notaichean agad an àite sam bith air an duilleag - na gabh dragh mu bhith a' dèanamh liostaichean no gan cumail sgiobalta.

Ma tha e na chuideachadh dhut, dh'fhaodadh tu do bheatha a bhriseadh sìos ann am pàirtean agus smaoinich air suidheachaidhean bho d' òige; an uairsin gluais air adhart gu bliadhnaichean nuair a bha thu nad dheugaire; nuair a bha thu nad inbheach òg; agus mar sin air adhart, fad na slighe suas chun an t-seachdain sa chaidh.

Thoir sùil mhath air na notaichean agad agus caith ùine a' smaoineachadh mu gach suidheachadh. Am measg a h-uile sian a tha thu air sgrìobhadh, dè an latha no an suidheachadh a tha àrd do chuimhne leis a' mhion-fhiosrachadh as mothachaidh?

Tòisich a' sgrìobhadh mu do dhànachd

Tha an t-àm ann airson an fhìor dhànachd: a' sgrìobhadh do sgeulachd.

Coltach ris an eacarsaich tòiseachaidh againn, sgrìobh sìos a h-uile mion-fhiosrachadh mothachaidh a chuimhnicheas tu bhon suidheachadh a thagh thu air an do chuir thu cuideam. Le bhith a' dèanamh seo gheibh thu bunait airson an sgeulachd agad. 'Slighe a-steach'.

'S dòcha gum faodadh aon de na mion-fhiosrachadh mothachaidh sin an sgeulachd agad fhosgladh – an sealladh a chunna tu, am fuaim a chuir stad ort. Ge bith dè an dòigh a thaghas tu airson do sgeulachd fhosgladh, cuidichidh na notaichean mion-fhiosrachaidh mothachaidh thu gus do shlighe troimhe a dhealbhadh fhad 's a tha thu a' tilleadh air ais don suidheachadh fiadhaich agad.