I nivver mind a time at du’s no been in me life.
I think back tae yun photos o wis at playgroup tagidder, at yun year’s Christmas dennir. We widda baith been two, so it mosst o been taen in 1990. We didna even keen een anidder den, an I dinna think we saa een anidder ageen until we baith endit up at nursery a couple o year laetir. Naedir o wis could ivver o kent it, but at some point durin yun time, we startit a conversation at wir still ay takkin up mair as 30 year laetir.
We wir tagidder da hale time trowe primary skule, regardless o whitivver else cam wir wye, an whaivver else tried tae come atween wis. We wir baith Brownie guides an bookwirms, an du wis da blaet een while I wis a bit looder. We wir inseparable. Secondary skule wis a peerie bit trickier, fir we wir in different year groups yun time, but we spent wir brakk times tagidder, an du wis really da person I could trust an rely on yun hale time, nae mettir whit.
Uni wis whar we wid really end up apairt – de in Edinburgh, doin chemistry at Edinburgh Uni, an me in Glasgow, doin English wi journalism an creative writin at Strathclyde Uni. But we tried tae veesit een anidder whar we could, seein as we haed a couple o brawly frequent transport links atween wir respective adoptit hame cities makkin it aesier fir wis. We baith still love a train journey. Eftir I graduatit, I bade on in Glasgow fir twartree year, an du wid feenish dy studies da followin year. No lang eftir yun, du got offered a peerie internship in Portugal, an we wid try tae Skype een anidder as much as we could while du wis dere. Eftir yun, du moved hame, an whinivver I guid nort fir a run, we ay met up. Be yun point it wis ower twinty year fae we wir first met, an still we could juist pick up whar we left aff an hit wid nivver be ony idder wye. It wis a comfort tae keen at nae mettir how auld we got, wharivver life took wis, nithin atween wis really cheenged.
Du got dy first job in Dorset onlie a few mont eftir du cam back fae Portugal. I wis chuffed fir de, but anxious as weel. It wis so far awa. Whit wid I do ithoot de? It got farder awa whan I moved hame fae Glasgow a year laetir. But du still cam hom, an we still got tagidder tae hing oot as we ay haed, an we wir still wis, even despite da geography.
Dir been twartree things happened fae den. I moved tae Aiberdeen tae geng back tae uni, an a few year laetir da lockdoons hit. A fair chunk o wir communication is taen place in writin mainly, an I’m been blyde fir da various apps we use. Den last simmer, juist eftir I wis won back fae bein in Shetland, we met up fir dennir while de an dy pairtner were passin through tae geng nort fir a lang owerdue veesit. Ageen, it wis laek nae time had passed atween wis, an as sad as I wis tae pairt wi you baith I guid hame feelin fulfilled, keenin at whitivver happens, we’ll ay hae een anidder.