Sanas sgrìobhaidh: Daoine cliùiteach sa choimhearsnachd

Tha innse sgeulachdan na phàirt fuaighte de dhearbh-aithne nàiseanta na h-Alba. Tha na sgeulachdan a tha sinn ag innse agus cò dha a dh'innseas sinn iad, nam pàirt bunaiteach d’ ar beatha.

Bho chuimhneachadh nan uirsgeulan a thàinig a-nuas thugainn bhon teaghlach, na mòmaidean far an do thuig sinn fhèin nas fheàrr, no na h-àiteachan, daoine agus coimhearsnachdan a chuidich sinn a' lorg dachaigh, tha sgeulachdan gar ceangal rinn fhìn agus ri na daoine mun cuairt oirnn.

Nuair a smaoinicheas sinn air na sgeulachdan a tha air a bhith nam pàirt mhòr d’ ar beatha, tha deagh theans ann gur ann bho daoine cliùiteach a thàinig iad Anns a h-uile coimhearsnachd tha daoine ann a thèid mìle a bharrachd; iadsan aig a bheil buaidh sònraichte air beatha dhaoine air dhòigh air choireigin. Daoine a tha a' brosnachadh chàich gu bhith beò ann an dòigh a tha brìgheil dhaibh no bhith a' rannsachadh am faireachdainnean.

Blàthachadh

Dèan trì colbhan air pìos pàipeir. Sa chiad cholbh, sgrìobh ainmean dhaoine a thug buaidh mhòr ort fhèin no air do choimhearsnachd thar nam bliadhnaichean. San dàrna colbh, dèan liosta de chuid de na feartan a tha a' dèanamh nan daoine sin sònraichte (an gnìomhan coibhneis, obair gun sguir, sealladh brosnachail air beatha). San treas colbh, sgrìobh sìos cuid de na mòmaidean a thug na feartan sin stiùir dha do bheatha fhèin.

Dian-bheachd

Tha an t-àm ann cuimseachadh air na rudan sònraichte sna mòmaidean air an do smaoinich thu. Carson a bha iad cudromach? Carson a dh'fhuirich iad nad chuimhne? Is dòcha gun do stiùir eòlas agus coibhneas leabharlannaiche ionadail thu chun an leabhar is fheàrr a leugh thu riamh. An do bhrosnaich deimhinneachd agus creideas an tidsear is fheàrr leat annad fhèin thu gu gnìomh mòr a choileanadh?

Feuch ri smaoineachadh mu cuid de na suidheachaidhean agus sgrìobh sìos beagan fhacail, ìomhaighean no seantansan a tha a' tighinn thugad.

Coimhead air ais

• A bheil cuideigin bho d' òige no bho d' òigeachd dheugach a tha tric air d' inntinn? Cuideigin a bha a' nochdadh ann an sgeulachdan gach neach? Ciamar a thug an neach seo buaidh air do phearsantachd no air do shealladh air beatha?
• Mura d' fhuair thu a-riamh cothrom air taing a thoirt dhaibh aig an àm, carson nach fheuch thu ri litir a sgrìobhadh thuca? Bheir labhairt dìreach riutha cead dhut a bhith fosgailte mun bhuaidh dheimhinnich a bh' aca air do bheatha.
• Dh'fhaodadh gur e cuideigin miotasach a bh' anns an duine cliùiteach sa choimhearsnachd agad, cuideigin air nach robh mòran aithne aig neach sam bith ach cuideigin air an deach sgeulachdan a dhèanamh agus innse. Ciamar a dh'obraich na sgeulachdan sin dhutsa agus do d’ charaidean aig an àm?

Coimhead air adhart

• Smaoinich air a’ choimhearsnachd agad ann an dà, deich no trithead bliadhna eile. Cò ris a bhios e coltach? Smaoinich air a' mhathas a tha air a thighinn mar thoradh dìreach no neo-dhìreach air an duine cliùiteach sa choimhearsnachd agad. Carson nach sgrìobh thu litir thuca, a' toirt moladh dhaibh airson an atharrachaidh a bhrosnaich iad.
• No dh'fhaodadh tu sgrìobhadh bhon mhòmaid a tha thu ag amharc san àm ri teachd, a' dèanamh iomradh air an adhbhar gu bheil e luachmhor dhut no don choimhearsnachd san fharsaingeachd.
• Ma bhios an sgrìobhadh agad a' tòiseachadh ri faireachdainn coltach ri coisrigeadh, ma dh'fhaodte gum biodh tu airson a thoirt beò ann an cruth bhidio cuideachd. Bhiodh òraid na mholadh freagarrach don duine cliùiteach sa choimhearsnachd agad.

Na thlachd an-dràsta

• A bheil neach nad bheatha an-dràsta a tha an-còmhnaidh gad bhrosnachadh no na daoine sa choimhearsnachd agad? Cuideigin a tha air a bhith na shòlas dhut tro amannan duilich.? Dè na gnìomhan coibhneis, iomairt no fealla-dhà a tha air seasamh a-mach dhut?
• Dh'fhaodadh gu bheil an duine cliùiteach sa choimhearsnachd agad a' dol mun cuairt gun fhiosta gur ann mar sin a tha daoine a’ coimhead orra. Cuideigin nach aithnich a h-uile duine ach a tha an-còmhnaidh a' cur gàire air d' aodann nuair a chì thu iad. Carson a tha an duine seo a' toirt air an àite sa bheil thu, a bhith a' faireachdainn mar do dhachaigh?

Tòisich a' sgrìobhadh

A-nis, le fios mu cò air bu mhath leat cuimseachadh, tha an t-àm ann tòiseachadh a sgrìobhadh!

Co-dhùin dè an sealladh bho bheil thu a' sgrìobhadh. An cruthaich thu e bho sealladh nas tràithe dhìot fhèin gus am faireachdainn no an aighearrachd àrdachadh? No mas fheàrr leat a bhith nas meòrachail agus nas dlùithe, dh'fhaodadh tu feuchainn ri litir a sgrìobhadh.

Ma tha na h-ìomhaighean a th' agad co-cheangailte ris an duine cliùiteach seo gu h-àraid beòthail, carson nach fheuch thu ri sgeulachd a ghlacadh tro chruth comaig?